“Балээлердин эң катаалына пайгамбарлар туш болушат. Кийин Аллахка жакындыгына карап олуя кулдар. Андан кийин даражасына жараша башка момундар...” дейт хадисте. Демек ошондой экен Аз.Хусейиндин Кербаладагы абалына карап, анын Аллахка канчалык жакын болгондугуна күбөө болобуз десек жаңылышпайбыз. Кербала - Ислам тарыхындагы эң айыккыс жара. Аны жазуу да айтуу да эстеш да оор. Андыктан бул окуяны жазуу мен үчүн жеңил болгон жок. Аша чаппоо үчүн, бирөөнүн акысына кирип албоо үчүн өтө этиятташым керек болду. Ошол себептен эки апта бою ушул окуяны кантип берүүнүн үстүндө ойлонуп жүрдүм. Максатыбыз тарыхты айтуу дагы ошондогу жараны тырмоо дагы эмес эле. Максатыбыз ошол окуядан өзүбүзгө сабак алуу болчу. Андыктан өзүбүзгө да сабак алуу аракеттин көздөө менен бирге түшүндүрүп берүүгө да далалат жасап көрөбүз. Аллахым баарыбызга туура сабак алууну насип кылсын деген тилек менен баштайбыз эмесе....