Published On Premiered Jul 1, 2024
अल्लो एक चिनारी बृत्तचित्र
नेपालको उच्च पहाडी भूभागका खर्क, खोला, खोल्सा तथा बाटोको छेउछाउका चिस्यान मलिलो स्थानमा पाइने सिस्नो प्रजातिको वनस्पतिलाई अल्लो भनिन्छ । समुन्द्र सतहबाट करिब १००० मिटरदेखि ३००० मिटरको उचाईमा पाइने अल्लो सिस्नो बढीमा तीन मिटरसम्मको अग्लो र मानिसको औलाको गोलाई जतिकै हाराहारिको हुने गर्दछ । अल्लो सिस्नो विविध कामका लागि उपयोगि वनस्पति हो । विशेष गरी यसको कलिला मुण्टाको साग तरकारीको रुपमा, जरालाई औषधिको रुपमा र लोक्ताको डोरी तथा धागो बनाई कपडा उत्पादनको लागि उपयोग हुने गर्दछ । अल्लोको लोक्ताको प्रशोधन गरी धागो बनाई विभिन्न किसिमका कपडाहरु उत्पादन गर्ने गरिन्छ । त्यसमा कोट, टोपी, कमिज, झोला, सल, पर्स, जुत्ता, स्याण्डल आदि प्रमुख उत्पादन हुन ।
अल्लोको धागो बनाई कपडा उत्पादन गर्ने काम मुख्य गरी संखुवासभा जिल्लाको सिलिचोङ गाउँपालिकाका कुलुङ जातिले आफ्नो परम्परागत पेशाको रुपमा गर्दै आइरहेका छन् । त्यस्तै सोलुखुम्बु जिल्लाको महाकुलुङ गाउँपालिका र भोजपूर जिल्लाको साल्पासिलिछो गाउँपालिकाका कुलुङ जातिले पनि अल्लो कपडा उत्पादन गर्ने व्यवसाय शुरु गर्नु भएको छ । हाल आएर खोटाङ, ताप्लेजुङ जिल्लामा पनि अल्लो कपडा उत्पादन गर्ने काम शुरु भएको छ । त्यस्तै पाल्पा, रुकुम, रोल्पा जिल्लामा समेत अल्लो कपडा उत्पादन गर्ने व्यवसाय विस्तार हुदै गइरहेको छ ।
अल्लो कपडा Antibacterial/जीवाणुरोधी गुणयुक्त Fiber/धागोबाट तयार पारिएको हुनाले देश तथा विदेशमा यसको माग उच्च रहेको छ । तथापी अल्लो कपडाको उत्पादन र प्रवर्द्धनमा राज्यको ध्यान कम जानले यो व्यवसायले ठूलो चुनौती भोगिरहेको छ ।
अल्लो एक चिनारी बृत्तचित्र कोशी प्रदेश सरकार उद्योग, कृषि तथा सहकारी मन्त्रालय अन्तर्गतको घरेलु तथा साना उद्योग कार्यालय, सङ्खुवासभाले निर्माण गरेको हो । यो बृत्तचित्रको सर्वाधिकार घरेलु तथा साना उद्योग कार्यालय, संखुवासभाको रहनेछ । यस बृत्तचित्र तयार गर्ने बगैचा मिडिया एण्ड एडभर्टाइजिङ प्रा.लि., सङ्खुवासभा प्रति यस कार्यालय हार्दिक आभार व्यक्त गर्दछ ।
प्रदेश सरकार
उद्योग, कृषि तथा सहकारी मन्त्रालय
घरेलु तथा साना उद्योग कार्यालय
कोशी प्रदेश
सङ्खुवासभा, नेपाल
" समृद्धिको लागि उद्यमशीलता "
