વિશ્વના સૌથી ધનાઢ્ય બિઝનેસમેન ઈલોન મસ્ક કમલા હેરિસથી ડરી ગયા હોય તેવું લાગી રહ્યું છે. તેમની વાતો પરથી એવું જ લાગી રહ્યું છે કેમ કે તેમનું કહેવું છે કે જો અમેરિકાના વાઈસ પ્રેસિડેન્ટ કમલા હેરિસ નવેમ્બરમાં યોજાનારી ચૂંટણીમાં ડોનાલ્ડ ટ્રમ્પને હરાવી દેશે તો તેઓ તેમને જેલમાં ધકેલી દેશે. ઈલોન મસ્ક ડોનાલ્ડ ટ્રમ્પના સમર્થક છે. ઈલોન મસ્કે તાજેતરમાં એક લાંબો ઈન્ટરવ્યુ આપ્યો હતો અને તેમાં તેમણે ઘણા મુદ્દાઓ વિશે વાત કરી હતી. ઈન્ટરવ્યુ લેનારા ટકર કાર્લસનને મસ્કે જણાવ્યું હતું કે, જો ડોનાલ્ડ ટ્રમ્પ હારી જશે, તો તેમની મુશ્કેલી વધી જશે. મસ્કનું કહેવું હતું કે તેમને લાંબી જેલની સજા થઈ શકે છે અને તેઓ તેમના બાળકોને જોઈ શકશે કે નહીં તે વિશે પણ તેઓ જાણતા નથી. શનિવારે પેન્સિલવેનિયાના બટલરમાં યોજાયેલી રેલીમાં ઈલોન મસ્ક રિપબ્લિકન ઉમેદવાર ડોનાલ્ડ ટ્રમ્પનું સમર્થન કર્યું હતું. તેમણે ઈન્ટરવ્યુ દરમિયાન પણ જાહેરમાં ડોનાલ્ડ ટ્રમ્પનું સમર્થન કર્યું હતું અને તેઓ ઈચ્છે છે કે ટ્રમ્પ ફરીથી યુએસ પ્રેસિડેન્ટ બને.