ལེ་ཚན་བཅུ་པ། རི་དེ་ཁུ་བྱུག་རི་ཞེས་པའི་འཁྲབ་གཞས་འདི་ནི་དབུས་གཙང་དམ་པ་ཆོས་ཀྱི་ཆོལ་ཁའི་ཡ་གྱལ་སུ་གཏོགས་པའི་ལྷ་ཁའི་ཁུལ་དུ་དར་ཁྱབ་ཆེན་པོ་ཡོད་པའི་འཁྲབ་གཞས་ཡིན། ནང་དོན་ནི་ལྷོ་ཁའི་མི་རྣམས་ལས་ལ་ བརྩོན་ཞིང་དཔའ་ངར་ལྡན་པ་དང་། གཤིས་རྒྱུད་བཟང་ཞིང་ཀུན་ལ་བྱམས་པའི་མི་རིགས་ཤིག་ཡིན་ཞིང་། རིག་གཞུང་ཕྱུག་པའི་ཆ་ལུགས་ཀྱི་ཁྱད་ཆོས་ཕུན་སུམ་ཚོགས་པ་ཡོད་པ་དང་། ལྷག་པར་དུ་སྣམ་བུའི་ཐོན་སྐྱེད་བཟང་པོ་ཡོད་སྟབས། ཧམ་དང་སྣམ་བུའི་གོས་རིགས་སོགས་འཚེམ་བཟོའི་སྲོལ་བཟང་ཡོད་པའི་རྣམ་པ་འབུར་དུ་ཐོན་པ་བྱས་ཡོད། ཕྱི་ལོ་ ༡༩༩༩ ལོའི་དབྱར་སྐྱིད་རྐང་བྲོ་གླུ་གཞས་འགྲན་བསྡུར་ཆེད་ ཚོལ་སྒྲུབ་བྱས་པའི་འཁྲབ་གཞས་ཤིག་ཡིན།