کلامِ شاعر بزبانِ شاعر
کلیم عاجز
آنکھوں میں کہیں آنسو نہ رہے سینے میں کسی کے دل نہ رہا
ہیں شہر میں قاتل ہی قاتل سنتے ہیں کوی بسمل نہ رہا

آنکھوں میں کہیں آنسو نہ رہے سینے میں کسی کے دل نہ رہا
ہیں شہر میں قاتل ہی قاتل سنتے ہیں کہیں بسمل نہ رہا

مت کہئے کہ اب مجنوں نہ رہا، لیلی نہ رہی، محمل نہ رہا
کہیے کہ لہو کا کھیل ہے یہ اور اتنا لہو فاضل نہ رہا

محرومی اہلِ محفل کا کب ذکر سرِ محفل نہ رہا
پہلے تو یہ غم تھا دل نہ رہا اب غم ہے کہ دردِ دل نہ رہا

جانے کہ نہ جانے اور کوئی ہم تو اُسے جانیں ہیں جس نے
قاتل کا ہمیشہ کام کیا اور نام کبھی قاتل نہ رہا

دلّی میں بہار آئی عاجز افسوس جنابِ میر نہیں
جب زخم رہا مرہم نہ رہا ، مرہم ہے تو زخمِ دل نہ رہا

کلیم عاجز