Published On Jan 9, 2024
Обал дүние

Әр тұсы тарлауыт жайдақ аңғардың ортасымен ағып жататын жіңішке өзеннің екі жағалауы бір кезде бірін-бірі жалғаса соққан тоқал үйлерден тұратын ауыл еді. Сонда бар ғой, анау аумағы әжептеуір алаңқайға адам аяғы баспайтын. Себебі, ортасын ала оқшау көзге түсетін жылан ордасы болды. Енді, міне, көкорай жусан көмкеріп жататын жазалаң беті астаң-кестең; гүріл-сарылы дүниені көшірген техникалар топырағын тегістегенде, жылан ордасын да жым-жылас қылды. «Қап, әттеген-ай» деп бұл тұрды. Алпыс екі тамырының бірі үзіліп кеткендей денесін қуалап, діріл жүгіріп өткен.
Алпыс жыл бойы күнде көріп жүрген жазалаң мен жылан ордасының орны дөңгеленген қап-қара топыраққа айналды. Кезінде, оны айтпағанда, дәл осы сағатқа дейін кімнің де әлгі алаңқайды айдаладан айналып өтетіні рас еді. Ес жиып, етек жапқанда білгені жылан ордасының басына баратын жалғыз адам Құсатай соқыр болатын. Күмістей сақалы кеудесін жапқан шынашақтай шал. Жасын ешкім білмейді. Әйтеуір, әкелерінің, аталарының, бабаларының кезінде де болған десетін. Бұл сұрайтын әкесінен: «Сондай да бола ма?» деп. «Жұмбағы көп дүниеден не сұрайсың» деп күмілжитін ол. Ары қарай тықақтайды ғой: «Көзінің мүлде көрмейтіні рас па?» «Солай сияқты». «Неге сияқты?..» «Жұрттың білетіні сол». «Қайтіп жол тауып жүреді?» «О жағы құдіреттің ісі». Құдіреттің ісі емей, немене, үлкендер айтса, Құсатайдың құсы, жыланы бар. Өзін мейлі, сыртынан келеке-мазақ еткендерге де түнде құсы мен жыланын жібереді екен. Құсы қанатыңмен терезені сабалап, жыланы қойыңа кіріп, түні бойы жаныңды көзіңе көрсететін көрінеді. Оны қояқ қойғанда, Құсатай кімнің не ойлап жүргенін де біліп қоятыны өз алдына десетін. Жаман пиғыл, бұзық ойы барларға да құсы мен жыланын жіберетін екен, түнделетіп. Осы бір елден естігендері ертегі секілденетін, бұған. Оқта-текте, оқыс бетпе-бет келіп қалғанда сәлем бермесе, жұрт Құсатайға, Құсатай жұртқа жолай бермейтін-ді. Балалар жағы мүлде. Алыстан ғана төбесін көріп жүретін. Сонда да жылан ордасының басынан. Күн жұмада көк есегін жайына қойып, ұзақ-ұзақ отырар еді, ол. Не істеп, не қояды, беймәлім. Болжам көп. Тоқ етері - жыланмен тілдеседі, сірә.
авторы Несіпбек Дәутайұлы
тексті оқыған Қуат Ахметжанов
#әңгіме #әңгіме #аудиокітап #болғаноқиға #қазақшаәңгімелер #әңгімелержинағы #әсерліәңгіме #аудиоәңгіме #kazakhstan #қазақшаой салар әңгімелер