عمرك سألت نفسك مرة ..
ليه ربنا خلق الحيوانات
هتقوللى عشان ناكل لحمة .. ماشى
طب والحيوانات اللى مش بناكلها

اقولك انا ..
لما فكرت ..
لقيت ان الحيوانات اتخلقت
عشان نقدر كلنا نجاوب على سؤال مهم ..
انا فعلاً استاهل ان يتقال عليا بنى آدم أو لأ ..

لو الكلب بيحب اكتر منى ..
يبقى هو اللى انسان مش انا

لو الكلب وفى اكتر منى ..
يبقى هو اللى انسان مش انا

لو الكلب هيشوف المعاق طبيعى ..
يبقى هو اللى انسان مش انا

اقلعوا النضارة اللى بتبصوا بيها لولادكم

قرف الشغل ولادكم مالهمش ذنب فيه

مشاكلكم مع بعض ماتخلوش ولادك يدفعوا فاتورتها

الأبوة الصح ..
انك تسيب مشاكلك وطلباتك على باب بيتك قبل ماتدخل
عشان ولادك يحسوا ان بابا دا كله بتاعهم ..
مش بواقى اللى فاضل بعد الشغل والخروج

والامومة الصح ..
انك تقفلى على مشاكلك وتركنى طلباتك على جنب
عشان ولادك يحسوا ان ماما دى كلها بتاعتهم ..
مش بواقى اللى فاضل بعد المناقشات والمشاكل

ولادكم ارض خصبة ..
هتطلع لكم اللى هتزرعوه ..

زرعتوا ورد ..
هتفضلوا تشموا اجمل ريحة طول عمركم

زرعتوا شوك ..
ماتزعلوش لو فضلتوا طول حياتكم بتنزفوا

وعلى رأى اللى قال ..
ولادنا هتطلع زى ماحنا عايشين ..
مش زى ماحنا عايزين ..

والكلام دا حقيقى جدااا ...

أمير تادرس