Published On Apr 16, 2022
မြန်မာ့ရိုးရာမုန့်လေးတခုဖြစ်တဲ့ ခေါပြင်လုပ်နည်းလေးပါ။ ခေါပြင်ဟာ ခေါပုတ်နဲ့ လုပ်နည်းအရမ်းမကွာတာကြောင့် အမျိုးတွေတော်တယ်လို့ ထင်မိပါတယ်။ စျေးထဲမှာ ရောင်းတဲ့ ခေါပြင်အိအိလေးကို အုန်းသီးများများ နှမ်းထောင်းများများနဲ့ သကြားလေးဖြူးပြီးစားတဲ့အခါ တော်တော်လေးကို စားကောင်းပါတယ်။ တချို့တွေက မြေပဲဆန်လှော်ကိုပါ ထည့်စားကြတာမြင်ဖူးပေမယ့် စျေးတွေမှာ ရောင်းတဲ့ ပုံစံလေးအတိုင်း မြေပဲစံမထည့်ဘဲ လုပ်ထားပါတယ်ခင်ဗျာ.. (လုပ်နည်းကို စာနဲ့လည်းရေးပေးထားပါတယ်)
ခေါပြင်လုပ်နည်းဗီဒီယိုကြည့်ရှုရန်အောက်က လင့်ကိုနှိပ်ပေးပါ။
ခေါပြင်လုပ်ဖို့အတွက် ကောက်ညှင်းဆန်ကို ဆန်ချိန်ခွက် ၃ ခွက် သုံးပါတယ် (မည်သည့်ချိန်ခွက်နဲ့မဆို သုံးလို့ရပါတယ်။ အဲ့ဒီ့ချိန်ခွက်နဲ့ပဲ ကောက်ညှင်းချက်လို့ ရေထည့်တဲ့အခါ ပြန်ချိန်ပါမယ်)။
ကောက်ညှင်းဆန် ၃ ခွက်ကို ရေဆေးပြီး ရေသန့်နဲ့ ရေစိမ်ပေးထားပါ။ ၄ နာရီလောက်အနည်းဆုံးစိမ်ပေးထားရပါမယ်။ (ကျွန်တော်က ညလုံးပေါက်စိမ်ထားပါတယ်)။ စိမ်ထားတဲ့ရေတွေကို သွန်ပစ်ပြီး ထမင်းပေါင်းအိုးနဲ့ ချက်လို့ရပါပြီ။
ကောက်ညှင်း ဆန် ၃ ခွက်ကို ရေ ၂ခွက်ခွဲ ထည့်ပေးပြီး ပုံမှန် ထမင်းချက်သလိုပဲ ချက်ပေးပါ။ ခေါပြင်ကို မာတာကြိုက်တဲ့သူအတွက် ကောက်ညှင်းဆန် ၃ ခွက် ဆို ရေက ၂ ခွက်ကျော်ကျော်လေးထည့်ပေးရင်ရပါပြီ။ ကောက်ညှင်းချက်ထားတဲ့အခါမှာ ထောင်းဖို့ သစ်သားဆုံ တခု လိုပါတယ်။ သစ်သားဆုံ ကိုရေဆေး ရေသုတ်ပြီး အနံ့မရှိတဲ့ ဆီ (နေကြာဆီ။ ပဲပိစပ်ဆီ) နဲ့ သုတ်ပေးပါ။ ပြီးရင် ကောက်ညှင်းကျက်တာနဲ့ သစ်သားဆုံထဲထည့်ထောင်းပါ။ အကြာကြီးထောင်းဖို့မလိုပါဘူး.။ ကောက်ညှင်းတွေပူတုန်းထောင်းတာဖြစ်တဲ့အတွက် ထောင်းရတာမြန်ပါတယ်။ ၃မိနစ်လောက်ဆို ကောက်ညှင်းစေ့တွေ မပျောက်တပျောက်အနေအထားရပါပြီ။ (ဂျပန် တွေ မိုချီ mochi ထောင်းသလို ညက်ပြီးချောနေအောင်ထောင်းဖို့တော့ မလိုပါဘူးခင်ဗျာ) ပြီးရင် ငှက်ပျော်ရွက်ကို ရေနဲ့ဆေး။ခြောက်အောင်သုတ်။ ဆီနဲ့ပြန်သုတ်ပါ။ ခုနက ထောင်းထားတဲ့ကောက်ညှင်းတွေကို ထည့်ပါ. (ကောက်ညှင်းတွေကို အပျဥ်ကြီးဖြန့်ခင်းရတဲ့အတွက် ခေါပြင်လို့ နာမည်ပေးတာလို့လည်းဖတ်ဖူးပါတယ်)ကောက်ညှင်းတွေက လက်တလုံးအထူလောက်ဆိုရပါတယ်။ အပေါ်ကနေ ဆီသုတ်ထားတဲ့ ငှက်ပျောရွက်ပြန်ခင်းပါ။ တလှိမ့်တုံးတခုခုနဲ့ လှိမ့်ပါ။ ဒါမှ ကောက်ညှင်းတွေက အနည်းငယ်ကျစ်သွားမှာဖြစ်ပါတယ်။ ငှက်ပျော်ရွက်မရှိဘူးဆိုရင် ဗန်းတခု ဒါမှမဟုတ် ပန်ကန်ပြားကို ဆီဝဝ သုတ်ပြီး လှိမ့်လည်းရပါတယ်။ ပြီးတာနဲ့ ခြစ်ထားတဲ့ အုန်းသီးခြစ်ရယ်။ နှမ်းလှော်ရယ်။ သကြားရယ် ဖြူးပြီး သုံးဆောင်နိုင်ပါပြီ။ ကောက်ညှင်းတွေက ပူရင်ပျော့ပြီး အေးရင် မာသွားတဲ့အတွက် အေးသွားမှ ခေါပြင်ကို ကတ်ကြီးနဲ့ညှပ်တာက ပိုပြီးကောင်းပါတယ်။ ပူတုန်းညှပ်ရင် အကုန်ကပ်ကုန်ပါလိမ့်မယ်။ သူငယ်ချင်းအားလုံး နှစ်သစ်မှာ လူသစ်စိတ်သစ်နဲ့ ကျန်းမာပျော်ရွှင်ကြပါစေ။
