أمي أقرب شخص لي.. وارتبطت بـ 9 بنات

«أنا اتولدت في يوم 10/4/02009 بمنطقة فيصل بالجيزة، وبعدها سافرنا على الكويت وعشت مع عيلتي أبويا وأمي وإخواتي الاتنين في مدينة حولي بدولة الكويت، وبالنسبة لأهلي فـ أبويا محمد. ع. ا 48 سنة ويعمل مدير مالي في شركة أرفلون للمصاعد بالكويت، وأمي غادة. إ. إ 43 سنة وهي خريجة حقوق القاهرة ومبتشتغلش، وعندي اخواتي حمزة - 10 سنوات وحلا 8 سنوات، كنا كلنا عايشين في شقة مكونة من صالة وغرفتي نوم واحدة ليا واخواتي وواحدة لأبويا وأمي وحمام ومطبخ وهي شقة حلوة

وبالنسبة لأقرب شخص ليا هي أمي، عشان هي حنينة وطيبة وبتحسسني بالأمان، وبحكيلها كل حاجة عني، ما عدا طبعا قصة الفيديوهات العنيفة الـ Gory videos، لأني كنت عارف أنها حاجة عميقة deep جوايا، محدش هيفهمها، وأما أبويا فـ أنا بحبه طبعًا، بس أمي أقرب عشان هو على طول غايب عن البيت، ودوامه في الشغل من 8 صباحا إلى 1 مساءً ودوام مسائي من 4 مساءً إلى 10 مساءً، فبحسه بعيد نفسيا عني، لكن هو مش سايبنا محتاجين حاجة ماديا خالص، وعمري ما اتعرضت لأي ضرب أو عنف من أهلي لأنهم طيبين وحنينين جدا».

«أنا من وقت ما تولدت أبويا جابنا على طول الكويت، وكنا بننزل مصر كل سنة وشهر أو شهرين تقعدهم في الصيف، وكنا بنقعد في شقتنا في فيصل، وبعدها نروح نصيف في الغردقة دايما».

أنا في الصف الثالث الإعدادي بمدرسة مودرن أكاديمي في الكويت، وأنا من كي جي لحد الصف السادس الابتدائي كنت في مدرسة صن شاين (الكويت) ومن أولى إعدادي لحد ثالثة إعدادي وأنا في مودرن أكاديمي، وأنا بحب اللغة الإنجليزية والعلوم أحياء وكيمياء بس مبحبش الفيزياء، وخلال فترتي الدراسية معرفتش أي حاجة عن تشريح الحيوانات غير أنهم السنة اللي فاتت ورونا فيديوهات التشريح لضفادع، وقتها كانت عادية بالنسبة لي محسستنيش بحاجة، وكمان أنا حبيت مدرسة صن شاين أكثر عشان بحس إنها بيتي، والكل كان بيتكلم إنجلش، والالتزام فيها أكثر، مودرن حاسس إن فيها تسيب والكل بيلبس كاجوال، وفيها مصريين كثير مدرسين ومحدش بيتكلم إنجلش.

وبالنسبة لأصدقائي فعندي يوسف 15 سنة هو جاري وصديقي وكمان هو معايا في مودرن أكاديمي، وكان معايا في صن شاين وعندي أقرب أصدقاء حاليا من مودرن أكاديمي محمد وسلمى وياسمين، وأنا قريب منهم عشان هما تلقائيين وصادقين وبيتكلموا في كل حاجة واهتماماتنا في الحياة واحدة في الأقلام والألعاب والأماكن اللي بنخرجها، زي مثلا إحنا بنخرج في المولات ونتغدى برة وبنخش سينما وأروح مكان لألعاب الفيديو بالمولات وساعات بعمل تجميعة ونلعب كورة أنا وأصدقائي».
واستكمل: «وعلى الرغم من كونهم أصدقائي بس مفيش حد فيهم عنده علم بفكرة اهتمامي لمجال الفيديوهات العنيفة الـ Gory videos، وعمر ما فكرت أقول لأي حد منهم حاجة بخصوص الفيديوهات العنيفة دي عشان كنت عايز الموضوع يبقى خاص private بيا أنا وبس ومش أي حد هيفهمها».

كان عندي صديقات سابقات كثير حوالي 9 تسعة بس دايما على سبيل الهزار والخروج واللعب وكده مفيش حاجة جد غير بنت اسمها حلا أنا على علاقة بيها دلوقتي، ومحصلش بينا تبادل لعلاقة جنسية، ممكن أحضان خفيفة بس، لأن أنا كنت بحب البنات بعطف، بس جنسيا مش زي مانا عايز، بحس إن جنسيا فيه حاجة مش مظبوطة».

أنا مسلم تمام بس من جوه بتصيبني شكوك كتير في وجود ربنا وتقبل نشأة الكون من العدم، فيقيني مش ثابت أوي، وبالنسبة لفكرة البعث بعد الوفاة أنا بفكر في ده على طول، وشايف إنه لما نموت فيه جنة مؤقتة هنروحها لحد يوم القيامة لما ربنا يحكم علينا كلنا، بس فيه حاجة مهمة إني مش مؤمن بفكرة النار الأبدية اللي ربنا هيدخلهلنا، وكمان أنا مقتنع بأن مفيش حرمة للنفس اللي عايز يعمل حاجة بيعملها، وبعدين يبقى فيه حساب، وأنا مش فاهم يعني إيه ملمسش جسم تاني الموضوع عادي يعني».
أنا معانتش قبل كدا من أي أمراض نفسية أو عقلية، وفاهم كل اللي بيحصل، بس معظم الوقت حاسس إن مشاعري
متبلدة، مبحسش بحاجة أوي، وكما لا اتوصفلي ولا أخدت حاجة من أدوية خاصة بالصحة النفسية والعقلية أو حتى أي وصفة طبية، وعمري ما تناولت الخمر أو تعاطيت أي مواد مخدرة، وأنا معنديش أي أمراض عضوية مزمنة، وأنا الحمد لله سليم معنديش أي أمراض، غير إن عندي حساسية على الصدر بس مزمنة».