Published On Aug 3, 2017
ព្រះសង្ឃខ្មែរក្រោម ដែលត្រូវបានសមត្ថកិច្ចខ្មែរ ចាប់ព្រះកាយផ្សឹក កាលពីថ្ងៃទី ១ ខែសីហា ២០១៥ នៅព្រឹកថ្ងៃព្រហស្បតិ៍ទី ៣ សីហា ២០១៧ នេះ ត្រូវបានតុលាការដោះលែង ឲ្យមានសេរីភាពវិញហើយ ក្រោយពីជាប់ពន្ធនាគារអស់រយៈពេល ២ ឆ្នាំ ។
ព្រះសង្ឃខ្មែរក្រោម ដែលត្រូវបានតុលាការដោះលែងពេលនេះ គឺព្រះនាម ដាវ ទេព្យ ។ ព្រះអង្គត្រូវបានសមត្ថកិច្ចខ្មែរចាប់ខ្លួន កាលពីខែសីហា ឆ្នាំ ២០១៥ ជាមួយព្រះសង្ឃខ្មែរក្រោម ១ អង្គផ្សេងទៀត ព្រះនាម ជា វណ្ណដា ។
បន្ទាប់ពីចេញពន្ធនាគារ ព្រះតេជព្រះគុណ ដាវ ទេព្យ ក៏បានសាងផ្នួសឡើងវិញហើយ នៅព្រឹកថ្ងៃដដែល នៅវត្តសាមគ្គីរង្សី ភូមិទ្រា ០២ សង្កាត់ស្ទឹងមានជ័យ ខ័ណ្ឌមានជ័យ រាជធានីភ្នំពេញ ។
កាលពីថ្ងៃទី ១ ខែមេសា ២០១៦ សាលាដំបូងរាជធានីភ្នំពេញ ផ្ដន្ទាទោសព្រះសង្ឃខ្មែរក្រោមទាំង ២ អង្គនេះ ឲ្យជាប់ពន្ធនាគារពី ៣ ខែ ដល់ ២ ឆ្នាំ ពីបទគំរាមសម្លាប់ និងរក្សាសារធាតុញៀន ។
ព្រះតេជព្រះគុណ ដាវ ទេព្យ ត្រូវបានតុលាការកាត់ទោសឲ្យជាប់ពន្ធនាគារចំនួន ២ ឆ្នាំ ។ ចំណែក ព្រះតេជព្រះគុណ ជា វណ្ណដា ត្រូវបានកាត់ឲ្យជាប់ទោសចំនួន ៣ ខែ ដោយកែប្រែបទ ចោទ ពីការប្រើប្រាស់ឯកសារសាធារណៈក្លែង ទៅជាបទស្លៀកដណ្តប់បែបព្រះពុទ្ធសាសនា ដោយគ្មានសិទ្ធិ ។ ចំណែកបទគំរាមសម្លាប់ និងការរក្សាទុកសារធាតុញៀន ត្រូវបានតុលាការ ទម្លាក់ចោលវិញ ។
កាលពីថ្ងៃទី ១ ខែសីហា ២០១៥ អាជ្ញាធរខណ្ឌពោធិ៍សែនជ័យសហការជាមួយកម្លាំងនគរបាលព្រហ្មទណ្ឌកម្រិតធ្ងន់ក្រុង និងមន្ត្រីធម្មការ បានចុះទៅត្រួតពិនិត្យរដ្ឋបាល នៅក្នុងវត្តអង្គតាម៉ិញ ស្ថិតនៅភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ ។ ក្នុងប្រតិបត្តិការនោះ អាជ្ញាធរបានឃាត់ខ្លួនព្រះសង្ឃពីរអង្គ ដែលជាព្រះខ្មែរក្រោម បន្ទាប់មកអាជ្ញាធរចម្រុះ ក៏បានរកឃើញនៅក្នុងកុដិព្រះសង្ឃទាំងពីរអង្គនេះ នូវគ្រឿងញៀនមួយកញ្ចប់តូច ដាវសាំមារ៉ៃ ១ កូនកាំបិត ១ ប៉័ងតោ ១ ស្រោមអនាម័យ ១ កញ្ចប់ និងសម្ភារៈមួយចំនួនទៀត ។
ទាក់ទិន នឹងករណីចាប់ព្រះកាយព្រះសង្ឃខ្មែរក្រោមផ្សឹកនេះដែរ កន្លងមកសង្គមស៊ីវិលបានរិះគន់ទៅលើចំណាត់ការរបស់សមត្ថកិច្ច និងតុលាការចំពោះករណីព្រះសង្ឃទាំង ២ អង្គ ។ ពួកគេថា វត្ថុតាងដែលតុលាការយកមកដាក់បន្ទុក មិនអាចយកធ្វើជាមូលដ្ឋានច្បាប់បានឡើយ ដោយហេតុថា ក្នុងពេលសមត្ថកិច្ចស្វែងរកវត្ថុតាង ព្រះសង្ឃទាំង ២ អង្គមិនឋិតនៅកន្លែងឡើយ ហើយក្រោយមកត្រូវបានសមត្ថកិច្ចចាប់បង្ខំឲ្យផ្តិតមេដៃទទួលស្គាល់ វត្ថុតាងទៅវិញ ។ លើសពីនេះ យុវជនដែលជាដើមបណ្ដឹងប្ដឹងព្រះអង្គទាំងពីរ ពីបទគំរាមសម្លាប់ ក៏ត្រូវសមត្ថកិច្ចបង្ខំឲ្យផ្ដិតមេដៃលើពាក្យបណ្ដឹង ហើយក្រោយមកយុវជនរូបនោះថែមទាំងបានដកពាក្យបណ្ដឹងវិញទៀតផង ។
ចាប់តាំងពីចុងឆ្នាំ ២០១៤ មក មានព្រះសង្ឃខ្មែរក្រោម ចំនួន ៥ អង្គហើយ ត្រូវបានសមត្ថកិច្ចខ្មែរចាប់ខ្លួន ក្នុងនោះមានអតីតព្រះសង្ឃ សឺន ហាយ ឃិន វណ្ណៈ សាន កុសល ព្រមទាំងព្រះសង្ឃ ដាវ ទេ ព្យ និងជា វណ្ណដា ។ ពួកគេត្រូវបានតុលាការចោទប្រកាន់ពីបទប្រើប្រាស់ឯកសារសាធារណៈក្លែង បទប្រឆាំងអ្នករាជការសាធារណៈ បទចូលរួមសមាគមទុច្ចរិត បទគម្រាមសម្លាប់ និងការរក្សាសារធាតុញៀន ៕ អត្ថបទ និងរូបថតៈ ស៊ឺន ចែងចើន
#ThePreyNokorNews, #PreyNokorNews, #ទូរទស្សន៍ព្រៃនគរ
----------------------
ទូរទស្សន៍ «ព្រៃនគរ» ជាទំព័រផ្លូវការរបស់នាយកដ្ឋានព័ត៌មាន នៃសហព័ន្ធខ្មែរកម្ពុជាក្រោម ( KKF ) ។ លោកអ្នកនាងអាចតាមដានអាន និងមើលសេចក្តីរាយការណ៍ជាវីដេអូផ្សេងទៀតរបស់ទូរទស្សន៍ «ព្រៃនគរ» តាមរយៈអាសយដ្ឋានបណ្តាញសង្គម ដូចខាងក្រោម ៖
ទទួលការជូនដំណឹង: https://bit.ly/31R617q
គេហទំព័រ: http://www.preynokornews.info
ហ្វេសប៊ុក: / preynokornews
ធ្វីទ័រ: / preynokornews