Published On Aug 11, 2024
ياناس الحسن راح شلون بفرگته ارتاح
كاسر ظهري فرگاه ولازم بيدي الصفاح
بعد مليت الفراگ لخوي اهواي مشتاگ
*****
ضيعت اخوي ومن ضاع ضيعت ذيج الخوه
عالحسن ابجي وفرگاه وابجي العشرته الحلوه
فارگته وفراگه ايطول وبعده العمر مايسوه
تمنيت اموتن وياه وآنه اندفن مو هوه
ماكو احله من الاخوان احنان وكلش احنان
والفاگد اخو راح يلزم باب الاحزان
ليش احلامي تنباگ لخوي اهواي مشتاگ
*****
الفاگد اخو مايرتاح اتصير روحه بگبره
والگضه كل عمره وياه بفراگه يكره عمره
عافاني اخوي ومن راح خلالي بس الذكره
حلوه عشرتنه وتدرون راحت هذيج العشره
اذكر كعدته وياي وجنه انسولف اهواي
راحت ذيج الايام وصارت ظلمه دنياي
صدري من الهجر ضاگ لخوي اهواي مشتاگ
*****
عالنعش طشيت الروح وظليت المها بصبري
فارگني اخوي وفرگاه خلاني لازم ظهري
احفر بگبره وحسيت احفر يناس بگبري
مدري عليه هلت اتراب مدري هلت كل عمري
صلفه عيون التراب ضمت اغله الاحباب
ما ندري الهجر ضيم وهيج ايطول الغياب
حرگت گلبي الاشواگ لخوي اهواي مشتاگ
*******
ليش النحبهم يمشون وما نلحك انودعهم
كلهم مشو دون اوداع راحو وما نسمعهم
والمگبره كلها اعزاز ياناس شيرجعهم
ما ندري يرحون بساع ومن ايدنه انضيعهم
اشگد فاگد اعزاز وبيهم ماشي جناز
عشره وي الگبور وبيهم جرحي يمتاز
گلبي عله الحسن طاگ لخوي اهواي مشتاگ
*******
جروحه وحسرته وفرگاه ركضن علي فد ركضه
وشگد بجيت عله الراح بجلمة اخوي ارد احظه
الدافن اخوه المن ظال هوه الاخو شيعوضه
وذكر يگل للعباس لتعوف اخيك لحظه
يگله بآخر انفاس اخيك هذا عباس
تظل ايظل الحسين تعوفه تشمت الناس
عفت عباس عالراگ لخوي اهواي مشتاگ
*******
ها يالحسن گوم وياي ردتك يخويه الباجر
ابلا اخو لو ظليت اعليك ادير الناظر
عازتها عازه الخوان الماعنده اخو ايظل حاير
من هسه اكلك عالخيل يكسر اضلوعي الحافر
يكتل طعن الرماح وتعب من الاجراح
خويه تدري عطشان يذبحني الشمر راح
دمع الفرگه حراگ لخوي اهواي مشتاگ
******
تمت
ميثم العمري
