由MIRROR成員盧瀚霆（Anson Lo）及呂爵安（Edan），夥拍陳漢娜（Hanna）及沈殷怡主演的ViuTV劇集《社內相親》現正熱播，四人的角色各有發揮，加上鬼馬搞笑的情節，大獲網民好評。隨着劇情發展，社長Timo（Anson Lo飾）與Hollie（陳漢娜飾）展開感情線，當中不乏恩愛鏡頭，踏入結局周，二人拍拖的甜蜜畫面亦率先曝光。

AL與Hanna在劇中飾演一對浪漫甜蜜的拖友，除了早已曝光的咀嘴場口外，亦有不少Sweet畫面，《星島頭條》捕捉了結局的一段甜蜜攬攬片段，二人於中環街頭穿上白色情侶裝，AL以一身白馬王子Look上陣，相當有型；而Hanna則以全白短裙打扮示人，可謂襯到絕。

劇情講述二人甜蜜約會，當Hanna見到AL即主動飛撲埋去攬實對方，雙手鈎在AL膊頭的Hanna更冧爆表示：「擔心死我」。正當二人情深對望，準備埋身攬攬之際，突然一個足球「從天而降」飛過二人身邊，工作人員立即飛撲接波，AL亦反應奇快地伸出手擋駕護女方，盡顯男士風度，二人當時被嚇一跳，但驚魂甫定之後隨即繼續拍攝，再度肉緊攬到實一實，當街打情罵俏，場面甜到漏，羡煞旁人。

#盧瀚霆 #AnsonLo #陳漢娜 #社內相親 #教主 #神徒 #星島娛樂