الطيب يا اهل العرف ما هو صناعة
ولا شرط ياتي في عزاز القبايل

وهبة من الرحمن مثل الشجاعة
أو ورث من طيب الجدود الأوايل

والعز ما يبنيه أهل الوضاعة
يبنيه من هو يرتكي للثقايل

كم واحدٍ جده عزيز بطباعه
عقبه هدم عزه يدين السلايل

وكرامة الرجال أغلى متاعه
لا ضاع ما يلقى العوض بالبدايل

لا عزة وطيبة ولا من شجاعة
حيث الكرامة فوق كل الخصايل

قد قالها "بهيج" وجلا بالجماعة
يوم انكسر وانزاح عن حكم حايل

عرض عليه خصومه لزوم قاعه
من دون حكم ويزبن براس طايل

عيّا يكون الرد سمعٍ وطاعة
وحفظ كرامة ربعه ورد قايل

لا صار ما حكم الفتى في ذراعه
هبيت يا حكمٍ يجي بالدخايل

#يوسف_العبيدي