.
#20241002 #chatoftheday
.
🇭🇰 以最自然心態創作《自然》—— iii《自然》新歌訪談 🎵
.
iii 上年積極參與多套電影配樂，獲得好大迴響之餘亦令大眾更認識 iii 嘅音樂。而今年佢回歸自己嘅音樂創作，推出「廣東歌五部曲」音樂企劃。承接五月推出嘅首部曲《Last Dance》，iii 最近推出咗呢個企劃嘅第二部曲《自然》
.
佢話自己係一個典型嘅摩羯座，無論係喺工作定人生上都會對自己有一定嘅要求。但佢慢慢發現原來呢啲咬得好緊嘅執著，會限制咗自己嘅發展。今年 iii 決意要改變一向嘅創作模式，喺創作音樂時回歸「想做就做」嘅心態；而「五部曲」嘅故事正正反映到佢嘅轉變，因為其實佢一開始冇諗過創作「五部曲」。佢喺構思新歌時同監製 Perry 一齊聽返好多自己寫落嘅 demo，逐漸就喺呢堆 demo 入面揾到共通點。於是就以歐陸式編曲作為五部曲嘅風格，將自己描繪成喺舞台上演出嘅主角，等聽眾聽歌同睇 MV 嘅時候可以代入表演者嘅角色，同 iii 一齊享受當下
.
成個訪談過程中，最令小編深刻嘅就係 iii 分享佢同團隊拍攝「五部曲」MV 嘅過程。因為今次佢同團隊一次過拍哂五個 MV，仲要五個 MV 都係用一鏡到底嘅拍攝手法！呢個做法好講求歌者、舞蹈員、攝影師、導演多方面嘅配合，由於 MV 不經剪接，所以拍攝過程中稍有差池就需要重新拍過。小編聽住 iii 介紹 MV 時都覺得呢個任務好心力交瘁，但見到佢講述成品時滿足嘅表情，就知道就算過程幾辛苦都值得。希望樂迷喺欣賞 MV 嘅時候會感受到佢哋嘅心思
.
今次完整版訪談會同大家探討關於第一部曲《Last Dance》嘅介紹、第二部曲《自然》嘅製作過程、以及成個「廣東歌五部曲」企劃嘅概念！🇭🇰🎵
.
「廣東歌五部曲」將會組合成一張 EP，連同餘下嘅三部曲喺今年内推出。iii 仲話希望喺出碟時舉辦一個發佈音樂會，同各位支持者重遇同分享音樂。關於 EP 同音樂會嘅消息，大家記得密切留意 iii 嘅社交平台喇
.
《Last Dance》iii
作曲：iii IrisLiu
填詞：周耀輝
編曲：Perry Lau、iii IrisLiu
監製：Perry Lau、iii IrisLiu

《自然》iii
作曲：iii IrisLiu
填詞：陳尖
編曲：iii IrisLiu
監製：Perry Lau / iii IrisLiu
.
#chatoftheday #hkmusic #香港音樂 #iii #IrisLiu #廣東歌五部曲 #LastDance #自然