اسطورة الوضح


لبيه ياصوت بنت الهرش وام الحوار
لاصار للحشو حنّه والحلال رزمه

واللّه ياكنّي ملكة البورصه والعقار
في شفها ماغبط التاجر على درهمه

أخوان واصحاب في دولة طوال العمار
ولاء وسمعٍ وطاعه واحترام أنظمه

بس التحدي يبي راس يتقادح شنار
من حيث ماشاف قمة مجد رز علمه

فالنسخه التاسعه يامرحبا ياذعار
نزهمك باسمك بدون خطاب ومقدمه

حيث إننا نعتبرك من الاسامي الكبار
واسمك مايكتب مع اهل الصنف بالمرسمه

اهلا هلابك ولكن خل صدرك مطار
لايضيق لاصار في صيهد رماح كتمه

يجوز تحلم بالاول حلم عابر ومار
لكن لاجيناك هذا الحلم لاتحلمه

قدّم ماعندك ولكن لاتقدّم عذار
العذر مرفوض وان قلت الكلام احتمه

عبدالله أعلن تصاريحه بوضح النهار
وصدح بصوتٍ جهورٍ ماهو بتمتمه

عمار يااسطورة الوضح المهيمن عمار
هو سيفنا اللي نماري فيه ونقدمه

واللي يرد البرا هو مادرى ويش صار
يومه ينآدي على بو عامر ويزهمه

اهل التحالف عثى فيهم وراحوا فرار
أجلاهم من الصياهد جعل مانعدمه

كم واحدٍ قبلكم من ساحة الوضح طار
ضيّق عليه المسار ايلين ضاع نسمه

من بعدها حالته صارت دمار بدمار
عرشه تهاوى على راسه وطاح سهمه

ليته قبل لايولع بالفتيل استخار
من قبل لاتزل عن درب الصواب قدمه

مايدري انّه غشيم ايلين يصدم جدار
والعذر معروف بيقول الجدار اصدمه

نصيحتي لاحدن ياقف بوجه القطار
يحوص ويشوف مخرج قبل لايعدمه

الشوط محسوم مافيها يمين ويسار
واللي يشكك يجيله يوم ونعلمه

تجودوا بالصبر ماعاد فيه اختيار
من في حزامه فشق للموعد يولمه

ندك روس الكبار وتحترمنا الصغار
الخير مانخصصه والشر مانعممه

سلام يالنظره اللي ماعليها غبار
اللي تزيح الخصيم وتكتسح لوسمه

آبو سعد ساس عز ومحزم ومستشار
تشوف فعله بعينك قبل ينطق فمه

ماينتخ الا نوادر من خيار البكار
كنّه تخيل ملامح زينها ورسمه

من روس قومٍ لاقالت للصعب دور دار
من فعلهم كاتب التاريخ جف قلمه

وان ثار عج الرمك والشوط نار وشرار
نقدّم اللي لاجات لشوطها تلطمه

وضحً لاقامت تدرع كنّ فيها وقار
وقار شيخ مبجل من نصاه خدمه

والوسره الفاخره غارب وجمب وفقار
من كل وصفٍ فريد تشوف فيها سمه

سندا وعرنونها شامخ وفيه انحدار
كنها تطالع بنجم سهيل وتكلمه

وكنّ اللحي وطفحانه سيف طلاب ثار
حالف مايرجع لغمده لين ياخذ دمه





كلمات :
محسن ال شماخ





اداء :
جفران بن هضبان





تنفيذ :
اهتمام الدوسري



..

من فضلك : اشتراك 🔔 Subscribe - لايك Like
فعل الجرس 🛎 ليصلك كل جديد

تصميم : اهتمام الدوسري
______________________

للتواصل والاستفسارات :
الحسابات الرسمية لـ قناة اهتمام الدوسري .

‏SNAPCHAT : P.5BF


‏Whatsapp : ‭050 608 9787‬









#النائلات
#النهدي
#جفران_بن_هضبان