يوم 8 مايو سنة 1972.. حصلت حاجه غريبة جدا فى مطار القاهرة.. جمارك المطار كانت موقفه أكتر من 1900 مجند من القوات السوفيتية اللى أمر الرئيس السادات بطردهم من مصر قبل حرب أكتوبر.. خير يا جماعه.. ايه اللى بيحصل؟.. فالجمارك قالت ان القوات السوفيتية اللى واقفه دى حاولت تهرب 80 كيلو دهب بره مصر.. طبعا الرقم كبير جدا.. والصدمة أكبر.. القوات السوفيتية بتحاول تهرب دهب مصر؟.. هى دى اخرتها يا اتحاد يا سوفيتى؟.. شعبى يقول عليا ايه؟.. متواطئ معاكم؟.. لكن بعد التحقيق.. تظهر براءة الجنود السوفيت.. ايه اللى حصل وازاى طلعوا براءة؟.. واذا كانوا معملوش كده مين اللى اتهمهم بكده أصلا؟.. وايه علاقة طرد الخبراء السوفيت بسرقة دهب مصر قبل حرب أكتوبر؟.. هقولك..

سنة 1972.. يعنى قبل حرب أكتوبر بسنة واحده.. المشاكل زادت بين الجيش السوفيتى وبين الفريق محمد صادق وزير الحربية فى مصر وقتها.. ليه؟.. لأن الفريق محمد صادق كان مقتنع بإن الاتحاد السوفيتى مبيحبش مصر.. ومش متعاون مع الجيش المصرى.. بالبلدى كده.. بيضحك علينا.. والدليل.. من وجهة نظر الفريق محمد صادق انه مش بيدينا التسليح اللى محتاجه الجيش المصرى علشان يحرر سيناء.. طيب كده احنا فهمنا ليه الفريق محمد صادق مش بيحب الاتحاد السوفيتى.. الاتحاد السوفيتى نفسه بقى مش بيحب الفريق صادق ليه؟.. أقولك الله ينور عليك.. ده سؤال حلو.. اسمع بقى القصة..

أولا كده الفريق محمد صادق مطولش فى منصب وزير الحربية.. اتولى المنصب فى مايو 71.. والرئيس السادات أنهى خدمته فى اكتوبر 72.. لكن ورغم الفترة القصيرة دى.. إلا أنه عمل كام حركة ضايقت الاتحاد السوفيتى.. أشهرهم موقفين هحكيهملك دلوقتى..
أول موقف كان لما الرئيس السادات سافر الاتحاد السوفيتى فى زيارة طويلة استمرت من 27 ابريل لحد 10 مايو.. الكلام ده كان سنة 72.. البحرية السوفيتية بلغت الجيش المصرى انها هتنفذ تدريبات عسكرية فى البحر المتوسط.. وانها بتستأذن الجيش المصرى ان قواتها تنزل فى مرسى مطروح لمدة يوم واحد كجزء من التدريبات.. يعنى هينفذوا عمليات إنزال كنوع من التدريبات.. وده متعارف عليه فى التدريبات العسكرية بين دول العالم.. إضافة إلى ان الاتحاد السوفيتى دولة صديقة لمصر.. والرئيس السادات ضيفهم فى الوقت ده.. يعنى لو متعشموش فينا هيتعشموا فى مين؟.. لكن يفاجئ الاتحاد السوفيتى بإن الفريق صادق بيرفض.. قالهم لأ.. محدش نازل عندنا واللى هلمحه هرميه فى البحر.. طبعا مقالش كده.. لكن لهجته فى الرفض كانت شديدة.. فطبعا الاتحاد السوفيتى سجل اللى حصل ده كموقف عدائي منه.. وبلغ بيه الرئيس السادات.. وبرده الرئيس السادات سجلها للفريق صادق.. صحيح مقلوش حاجه ولا اتدخل فى قراراته لكن فضل فاكرهاله..

بعدها وفى نفس الشهر.. شهر مايو 1972.. يتجمع فى مطار القاهرة شوية عساكر سوفيت خدمتهم انتهت فى مصر وراجعين بلدهم.. تقوم جمارك مطار القاهرة توقفهم بتهمة تهريب دهب مصر.. لأ معلش نعيد الجمله دى تانى.. تم احتجاز العساكر السوفيت فى مطار القاهرة بتهمة محاولة تهريب 80 كيلو دهب.. طبعا الكلام كبير.. احنا داخلين على حرب اكتوبر.. ومحتاجين مساعدة ودعم كل اللى حوالينا.. وفجأة تحصل مشكلة زى دى مع الاتحاد السوفيتى اللى المفروض هو أهم حليف استراتيجي لمصر وقتها.. فالموضوع كبير مش صغير..


المصادر
مذكرات الفريق سعد الشاذلى


#المواطن_سعيد #طرد_الخبراء_السوفيت #سرقة_ذهب_مصر