ازاي افهم النرجسي ان العلاقة الحميمة متنفعش وسيلة للصلح
ازاى الضحية تفهم النرجسي ان العلاقة الزوجية مش طريقة للصلح بالعكس مفروض انه يصالحها الاول ويرضيها من الالم النفسي الى اتسبب فيه اصلا علشان تبقى متقبلة هذا الامر ازاى تفهمة انه كده مصلحهاش ولا حاجة بالعكس هو خد حاجة مفيدة ليه هو مش ليها بالبيكون عبء عليها وهى مضايقة منه وازاى تخليه يفهم ان الامر دى ليه هو ومصلحتة هو وتخليه لما يغلط ويضايقها يحاول يراضيها بطريقة تخصها بطريقة ترضيها هي
للأسف للأسف مفيش الكلام دة مع النرجسي ، اذا انتي لسة بتسألي السؤال دة يبقى انتي لسة مش فاهمة كويس سيكولوجية النرجسي ، النرجسي اذا فهم ان دة بيضايقك حيعمله ويستمر عليه وحيكون أسلوب حياته معاكي كدة ، المشكلة انك أصلا بتخافي تقولي له لا انا مش عايزة العلاقة عشان انا ماعنديش رغبة على أساس انه حرام عليكي تعملي كدة في حين ان مش هو دة اللي حرام الحرام انه أصلا يقيم معاكي علاقة وانتي مش عايزة ، اسألوا الشيوخ المتوسطين عن ليه وامتى يكون حرام انك ترفضي العلاقة ، اللي هو من باب الدلع ،يعني شخط فيكي شخطة عادية او زعلتوا مع بعض على اسا انه زوج سوي فلما يجي يناغشك عشان يصالحك ويقيم علاقة ترفضي ، لكن مش لما يضربك علقة موت ييجي يقيم علاقة ويقع على زوجته كالبهائم ، ربنا قال وقدموا لانفسكم ، او انك تساوميه على طلب مش من حقك وتذليه بالعلاقة وتمنعيها عنه عشان تتحكمي فيه او تاخدي حق مش حقك هو دة الحرام واللي الملايكة تلعنك لو عملتيه ، انما في حال الشخص المضطرب اللي مخليكي في ضغط عصبي مستمر وجب لك الاكتئاب والامراض وضربك او هانك إهانة شديدة او سبك وسب اهلك او خاض في عرضك او بيتعمد يؤذيكي بدون أي سبب لمجرد ايذائك او انه بيعذبك او يهينك او يذلك او يذكر غيرك في اثناء العلاقة الحميمة وبعدين تقولي لي حرام امتنع عنه اسألوا الشيوخ انا مش حفتي لكن انا بفكر معاكم بصوت عالي انا مش بحرم ولا بحلل انا بقول اتصلوا بالشيوخ اسألوهم قولوا بيعمل كذا وكذا وكذا وانا مبقتش قادرة ولا عندي أي رغبة وانا ماعنديش مانع يتزوج لاني مش حقدر البي رغبته حرام علي ولا لا ، او انك تقولي للشيخ هو بيعمل كذا وكذا وكذا بيضربني مثلا وبعدين يطلب علاقة من غير مايراضيني وانا بكون معنديش أي رغبة وببكي من القهر اثناء العلاقة حرام عليا لو قلت له لا مش عايزة علاقة؟ اسألي شيخ وسطي وشوفي حيقول لك ايه واللي تسأل تقول لنا في التعليقات ،
طيب نرجع بقى للبيه النرجسي حتعملي ايه عشان مايطلبش العلاقة من غير مايصالحك ويراضيكي؟ مش حتقولي دة ابدا بشكل صريح ، انتي حتعملي شوية خطوات عشان توصلي له معلومة ان دي طريقة صلح فاشلة ومش حتجيب نتيجة ، اول حاجة دايما تحسسيه انك مبقاش عندك رغبة في العلاقة الحميمة ولو بطريقة شكوى وحيرة ومش فاهمة ليه وازاي ويمكن عندي مشكلة في الهرمونات ، مش عارفة ليه مبقاش عندي رغبة يمكن أكون مريضة ، دة كدة في وسط الكلام في أي مناسبة او حتى لما يطلب العلاقة وانتيب تستعدي وموافقة ومش بتقولي لا لكن بتوصلي له معلومة ان عندك مشكلة ، ودي حتوصل له معلومة حتكون مرعبة بالنسبة له خصوصا اذا كان فاهم ان العلاقة شيء مهم جدا بالنسبة لك فبيقدر يذلك او يتحكم بيكي عن طريقها فانتي بتفسدي له أسلوب من أساليب التحكم والتلاعب ، كمان هو فاكر انه بيصالحك بيها لانكب تحبيها فلما توصلي له له انك مش حابها بوظتي له المكافأة بتاعته وأصبحت مش مكافأة خالص ،فانتي مهم جدا انك توصلي له المعلومة دي بعيدا عن انك تحسسيه انك رافضاه لان قولتك لا للعلاقة هو بيعتبرها رفضك له هو شخصيا ، بعدين لما يصالحك بالعلاقة ويرجع يكلمك عادي كأنكم اتصالحتوا انتي ماتتجاوبيش وتتكلمي عادي وتقولي له انت بتكلمني ليه هو عشان عملنا علاقة خلاص اتصالحنا لا خالص العلاقة ملهاش علاقة بالصلح انت استمتعت وانا استمتعت ومحدش له فضل ع التاني ودة مش صلخ وانا مااتراضتش عشان نرجع نتكلم عادي ، لما تكرري الكلام دة كل مرة حيفهم ان لعبة العلاقة مش شغالة ، وكمان لما يطلب علاقة من غيرمايصالحك لازم ماتكونيش متفاعلة زي لما تكونوا كويسين عشان يفهم ان العلاقة انت لما تحاول تاخدها وانت مزعلني فانت حتخسر فيها ومش حتاخد كل اللي انت عايزه منها اكيد لازم يحس بالفرق ودة بيتطلب منك انك تجيدي العلاقة وتعرفي ايه اللي بيرضيه فيها عشان توقفيه لما يزعلك وحتبقي مجازفتيش ومنعتيها ولا اغضبتي ربنا
لكن ابدا ماتفكريش انك تتكلمي معاه وتقولي عايزة كذا ومش عايزة كذا لانه حيتصرف بالعكس