【東張西望】長洲「虐兒欺凌羅生門」後續 舊老師狂數學校職員3宗罪

《東張》於今年八月報導過一宗有關長洲中學「家長涉虐兒，學校涉欺凌」嘅羅生門事件，報導出街後引來社會極大反響，唔少該中學嘅學生、舊生以及長洲街坊紛紛聯絡《東張》，提供更多資料。

當時長洲一間中學嘅學生受傷，校方聲稱懷疑家長劉生虐待自己嘅三兒子，該校社工申請保護兒童令，從此三兒子就不得歸家，劉生劉太質疑學校申請保護兒童令係為咗掩蓋校園欺凌事件。

大量長洲街坊當時都認為劉氏家庭相處融洽，唔認為劉生會對兒子動武，更指責該中學嘅學生品行不端；《東張》攝製隊亦曾拍攝到該校學生似疑於校門欺凌其他同學嘅行為。

儘管如此，最終保護兒童令嘅判決結果亦只係從18個月保護令減至12個月，劉生劉太對法庭判決表示不滿及無奈。

事隔一個幾月，《東張》繼續跟進事件。期間學校社工隸屬機構曾就事件回應，指劉生劉太陳述完全與事實不符，對此劉太公開同學校社工嘅對話記錄，並直指於事件中，與撰寫報告嘅學校社工只見面3次，之後僅僅以語音或文字聯繫。

而對於校園欺凌投訴，校方曾向家長發書面信回應，卻只強調對校園欺凌「零容忍」，表示指控失實，實屬遺憾。

《東張》亦收到曾於該學校就讀或任教嘅校友及教師報料，都指出學校內部問題多多，有校友指校內朋黨勢大，無法無天；亦有老師指部份老師空堂期間愛玩手機炒股票，放學後亦會即離校；更有校友指，該校聘任校長任期機制存在問題，對此指控該學校有作出回應。

但最令人寒心嘅係，當時負責事件嘅校長以及輔導老師都早已離職或調職他校，事件可能就此不了了之，對此劉太直言感到十分失望。

#東張西望 #TVB #長洲 #虐兒 #欺凌 #社會 #民生 #時事

東張西望為你直擊香港民生時事：https://bit.ly/35Ba1zK
想免費睇番呢集嘅精彩內容？登入myTV SUPER免費點播最近7日TVB自製節目：https://su.tvb.com/q/eAHttNqm