เป็นผลงานการประยุกต์การสู่ขวัญขึ้นบ้านใหม่ให้เข้ากับยุคสมัยที่เปลี่ยนแปลงไป แต่ยังคงเนื้อหาสาระ วัตถุประสงค์ของการสู่ขวัญทุกประการ โดยบัณฑิตพราหมณ์เอกราช บุญอาจ ศิษย์สำนักพราหมณ์เชตะวัน โทร 0918325641 ‪@sukuan-online2022‬ #เพจคุรุเทพบารมี
สู่ขวัญขึ้นบ้านใหม่ยุคปัจจุบัน
ศรี ๆ มื้อนี้แม่นวันดี วันดิถีอมุตตโชค โตกนี้หากแม่นโตกไม้จันทน์ ขันใบนี้หากแม่นขันไม้แก้ว พ่อแม่เฒ่าแก่ปุนแม่นแล้วจึงยอมา มีทั้งข้าวใส่พา มีทั้งมาลาตกแต่ง กาบบัวแบ่งบายศรี มีทั้งไข่หน่วยดีเกลี้ยงปอด สุดยอดแล้วพาขวัญแก้วยกยอ เชิญพ่อหมอมาเป็นคนสู่ ให้เคียงคู่อยู่ชุ่มกินเย็น เคราะห์หรือเข็ญเวรทั้งหลาย ให้มันหลีกหนีไกล ฤกษ์บอกไว้ว่า มื้อนี้ แม่นวันดี วันเศรษฐีมีเงินล้าน วันขึ้นบ้านใหม่แห่งมหามงคล วันดลใจใสสะอาด วันขึ้นครองราชย์แห่งมหาชัย เพิ่นจึงไปอาราธนาอาจารย์ผู้ฉลาด มานั่งอาสน์เอิ้นเชิญขวัญ ตามกระบวนโบราณกล่าวไว้ เชิญเทพไท้เจ้าผู้มีบุญมาช่วยคูณช่อยยอขวัญหลานเจ้าเย้อ ข่อยจักเชิญ เอาเจ้ามาดฟ้าผู้อยู่ก้ำฝ่ายเหนือ มาช่อยคูณ ช่อยยอขวัญหลานเจ้าเย้อ ข่อยจักเชิญเอานางคำเฝือผู้อยู่ก้ำฝ่ายใต้มาช่อยคูณช่อยยอ ขวัญหลานเจ้าเยอ ข่อยจักเชิญเอา นางแอกไค้ผู้อยู่หออาสนาคำ มาช่อยคูณช่อยยอขวัญหลานเจ้าเยอ...ข่อยจักเชิญเอาเจ้าพ่อแม่ทั้งหลาย ทั้งคุณตาคุณยายที่นั่งรายเรียงล้อม .บัดนี้พร้อมกันแล้ว เสียงแซว ๆเตรียมฮ้องโฮ่ โอ่เอาขวัญหมู่เจ้าให้มาเข้าสู่คีง เจ้าอย่ามิดอิ้งติ้ง ยามขวัญมาให้เจ้าตื่น ให้เจ้าซื่นพ้อ ๆ อย่ารอช้าอยู่นาน อย่าสำราญมัวเล่นกลางไพรในป่า อยู่นาทามบ่อนนั้นพลันฟ้าวให้ต่าวมา ว่ามาเยอขวัญเอย...
กรณีสองเจ้าสร้างก่อเฮือนงาม ตามไปดูภายหลัง ตั้งแต่ยามคราวพุ้น บุญนั้นมาถึงแล้ว แนวอยากมีบ้านหลังใหม่ คิดเผื่อเหนือเผื่อใต้ สิเป็นได้ว่าซ่ำได๋ ตัดสินใจในคราวนั้น สิหาที่ทางได๋เหมาะ ที่มีความจำเพาะเพิ่งพาอาศัยซ้อน นอนหลายวันคนิงโอ้ ย้อนว่าโตบ่คือเพิ่น ย้านมันขาดย้านมันเขิน ย้านมันเกินกะพ่องนั้น หลายวันได้ว่าฮ่ำฮอน บ่อนนี้ดีสาแหล่ว แนวได๋ ๆ กะได้ผ่าน เป็นบ่อนสุขสำราญ บ่อนเบิกบานแท้ ๆ ไปหน้าสิอยู่ดี สิบ่มีภัยต้อง สิปรองดองเด้อมั่นแก่น เป็นบ่อนแถนอยู่ฟ้า ประทานให้ดั่งประสงค์ ตกลงแปลนได้แล้ว กะหาช่างฝีมือ คนกะลือเอาคักแม่นสมใจแม้น หาเงินแสนมาสร้าง หาปัจจัยนำทาง บ่ราร้างเด้อถิ่มปล่อย หัวใจวอยก่อยกั้น ขันสู้อยู่บ่ถอย คอยนับวันเห็นเจ้าตั้งแต่ยกเสาขึ้นตั้งก่อน ทุกขั้นตอนแต่นั้น ฮอดวันนี้กะแม่นบุญ ขอขอบคุณทุกท่าน ทั้งช่างใหญ่ผู้ใจดี เป็นผู้มีพระคุณสร้างเฮือนหลังนี้ สมศักดิ์ศรีสาแหล่ว เจ้าของเฮือนหลังใหม่ กว่าสิได้ซ่ำนี้ กะคอยลุ้นอยู่บ่วาย กะมีหลายกระบวนขั้น ปั้นแต่งความเป็นมา ตั้งแต่หาเงินตรา ริบรอมถนอมไว้ มีค่าของเครื่องใช้ช้าไวกะได้ผ่าน ทั้งประสานพุ้นพี้ ถึงเป็นหนี้กะบ่อือ ถือเป็นกิจใหญ่ล้น เกิดเป็นคนต้องสร้างก่อ ล้าปานได๋กะบ่ท้อ กะขอสู้บ่ถอย คอยมาถึงมื้อนี้ มีพิธีขึ้นบ้านใหม่ ได้สู่ขวัญโฮมใจ มาไวๆ เด้อบัดนี้บายศรีเจ้าให้ต่าวมา ...ว่ามาเยอขวัญเอย....
ขวัญเจ้าไปอยู่ซ้นหนแห่งทางได๋ ขวัญเจ้าลงไปไทยเที่ยวหาเงินแบ๊งค์ ขวัญเจ้าแข็งใจสู้กู้เงินเด้อก้อนใหญ่ อยู่ธนาคารหม่องได๋ ได้ยินเสียงแล้วบัดนี้ เชิญถ่อนให้ต่าวมา เจ้าอย่าได้เมื่อยล้า ให้กลับมารีบด่วน เชิญเอาขวัญหมู่เจ้าให้มาเข้าสู๋โฮง ตรงมาเด้อเร็วรี่ ในพิธีนี้รออยู่ เพิ่นได้เปิดประตู มีทั้งผู้ฮับต้อน สะออนเจ้าอยู่บ่วาย สิสบายไปหน้า มานอนเฮือนเด้อหลังใหม่ คิดอันได๋ ทำอันได๋ กะสิได้สมเจ้าปรารถนา ว่ามาเยอขวัญเอย....
ขวัญเจ้ามาฮอดแล้ว ให้เจ้าอยู่ดีมีชัย ขอให้ได้กำไรในทางการค้า เรื่องปูปลานาน้ำนาทามให้เข้าท่า ให้เจ้ามีปัญญา วาสนาบารมีเลิศล้ำ มีคนค้ำแม่นช่อยชู ให้เลิศหรูไปหน้า ทางยศถาบรรดาใหญ่ มีอนาคตกว้างไกล ได้เจริญก้าวหน้า ศรัทธาท่านบ่หวั่นไหว ให้สดใสไปหน้าเป็นมหาเศรษฐีเด้อท่าน ขอโองการเทพไท้ประทานให้แม่นสู่อันเด้อ..ว่ามาเยอขวัญเอย...
ขวัญแข้งให้เจ้ามาอยู่แข้งลีลา ขวัญขาให้เจ้ามาอยู่ขาลีล่าย ขวัญแขนขวาแขนซ้ายกะให้มาเต้ามาโฮม ทั้งขวัญนมและขวัญคาง ขวัญเอวบางกลมกิ่ว ขวัญท้องน้อยและฮาวนม ขวัญผมดำดูอาจ ขวัญปากต้านเจรจา ทั้งขวัญตาและขวัญคิ้ว ขวัญนิ้วและขวัญแขน ขวัญขาแพนหลังไหล่ ละใหม่นั้นแม่นขวัญหู ก็ให้มาสามื้อนี้วันนี้..ว่ามาเยอขวัญเอย......
ขวัญเจ้าไปโรงเหล้า ทำงานเช้าค่ำ อยู่ประจำแผนกนั้น วันนี้ให้ต่าวมา ขวัญเจ้ามาอยู่น้ำ นาทามน้ำแก่ง ถึงยามแลงค่ำค้อยให้ขวัญน้อยแม่นต่าวมา...ว่ามาเยอขวัญเอย..
เออ..คันแม่นขวัญมาแล้ว พราหมณ์สิเหล่าแถมพร ตัดเอาตอนคาถาแม่นดีเหลือล้น ขอทุกคนทุกท่านรับเอารีบด่วนประมวลพรส่งให้ผองเจ้าให้รับเอาเด้อ..สิทธิการิยะตะถาคะโต สิทธิลาโภนิรันตะรัง สิทธิเตโช ไชโยนิจจัง
ขอให้เจ้านี้ได้มีทรัพย์เนื่องนอง เงินไหลกอง ทองไหลมาแม่นสู่วันบ่มีเว้น อันว่าเคราะห์เข็ญฮ้าย ให้มีชัยเหนือทุกหมู่ ให้ได้อยู่แช่มช้อยเย็นจ้อยอยู่สู่วัน อันว่าโชคลาภนั้นให้ไหลหลั่งมาโฮม สมหัวใจทุกคนปรารถนาเอาเด้อ อย่ามัวเผลอสาแหล่วมีสติอยู่ทุกเมื่อ ให้มีล้นมีเหลือได้กินทานอยู่สู่มื้ออย่ามีพร่องขาดเขิน คนสรรเสริญยอย่อง สมควรเด้อท่าน พระนิพพานเป็นที่ตั้งสาแหล่ว คู่สู่คน..เคหัง ลาภัง ภะวันตุเต...นั่นเทอญ...