Published On Mar 4, 2019
ប្រវត្តិចម្រៀង
-------
បទ"សម្រស់កោះកុង" បានថតដាក់នៅក្នុងស៊េរីកាសែតនៅក្នុងកំឡុងឆ្នាំ ១៩៧៤ និងជាស្នាដៃនិពន្ធទំនុកច្រៀងរបស់ លោក មាស គក ដែលលោកមានស្រុកកំណើតនៅខេត្តកណ្ដាល ប៉ុន្តែ លោក មិនមែនគឺជាអ្នកនិពន្ធអាជីពខាងចម្រៀងនោះទេ ដោយលោកគឺជាសិល្បករបញ្ចូលសំឡេងខាងល្ខោននិយាយ រួមជាមួយ អ្នកស្រី ហួយ មាស លោក ម៉ៅ ប៊ុនថន អ្នកស្រី យ៉ក់ កែម លោក ញឹក សុខុម និង លោក ម៉ៅ អាយុទ្ធ ជាដើម។ សូមបញ្ជាក់ថាមូលហេតុដែល លោក មាស គក ចាប់ផ្ដើមនិពន្ធទំនុកច្រៀង គឺដោយសារតែ កាលពីសម័យសង្គមរាស្ត្រនិយម វិស័យសិល្បៈកម្ពុជាមានការរីកចម្រើនយ៉ាងខ្លាំង ហើយជំនាន់នោះ លោក មាស គក នៅក្នុងអង្គភាពសាលាល្ខោនជាតិ ហើយក្រុមល្ខោនជាតិតែងតែទៅសម្ដែងនៅតាមបណ្ដាខេត្ត ប៉ុន្តែរហូតដល់សម័យសាធារណរដ្ឋខ្មែរ ប្រទេសជាតិមានសង្គ្រាម ហើយរដ្ឋាភិបាលសាធារណរដ្ឋខ្មែរមិនអាចក្ដាប់ប្រទេសបានទាំងមូលនោះទេ ដោយសារតែទាហានខ្មែរក្រហម និងទាហានយៀក កុង បានវាយដណ្ដើមខេត្តមួយចំនួនទៅកាន់កាប់។ ហេតុនេះ ក្រុមសម្ដែងល្ខោនជាតិមិនអាចទៅសម្ដែងបានទេ ដែលធ្វើឲ្យ លោក មាស គក និងសមាជិកក្រុមដទៃទៀត បាត់បង់មួយផ្នែកធំនៃអាជីពការងាររបស់ខ្លួន ទើប លោក មាស គក និងសមាជិកដទៃទៀត បានគិតគូរទៅរកអាជីពផ្សេងដើម្បីរកប្រាក់មកទ្រទ្រង់ជីវភាព។ ហេតុនេះហើយនៅចន្លោះឆ្នាំ ១៩៧៣ ដល់ឆ្នាំ ១៩៧៥ លោក មាស គក បានចូលរួមនិពន្ធចម្រៀង ដែលដំបូងឡើយ គឺ មានលោក មែរ ប៊ុន ជាអ្នកជួយហៅ លោក មាស គក មកនិពន្ធ ព្រោះ លោក ម៊ែរ ប៊ុន និង លោក មាស គក គឺជាគ្រូនៃសាលាល្ខោនជាតិជាមួយគ្នា ដោយ លោក មែរ ប៊ុន បង្ហាត់ផ្នែកខាងនិពន្ធបទភ្លេង ហើយ លោក មាស គក បង្ហាត់ផ្នែកសិល្បៈល្ខោននិយាយ។
ត្រលប់មក បទ"សម្រស់កោះកុង" នេះវិញ ដោយតាមរយៈ លោក អ៊ុំ ហេ ជុនសិ ដែលជាអ្នករត់ការថតចម្រៀងកាលពីសម័យនោះ បានបញ្ជាក់ថា លោក មាស គក មិនដែលបានទៅខេត្តកោះកុងនោះទេ ហើយបទ"សម្រស់កោះកុង" នេះគឺកើតចេញពីការស្រមើស្រមៃរបស់ លោក មាស គក តែប៉ុណ្ណោះ ដោយមិនមែនជាអនុស្សាវរីយ៍ជីវិតរបស់លោកឡើយ។
------
ស្រាវជ្រាវដោយ ៖ លោក សេង តារា
• សម្រស់កោះកុង (ស៊ីន ស៊ីសាមុត) Samros K...
