مالوم عين(ن) تصطفق بعض الاحيان
شـافـت غـرابـيـل الـزمـان الـغـريـبـه
يـاكـثر مـاشـافـت و يـاقـل الايـمـان
بـقلـوب من بـقـلوبهم شـك ريبـه
مـن يـنـصـح اللـي يعتقد له بكهّان
يـشـرك مـع الله واحـد مـايثيبه
لو يصدق الكاهن طلع منه برهان
وافتّك نفسه من حدوث المصيبه
لاشـك كـذّاب خـذوا منه كـذبـان
والله صدق علاّم غيبك و غيبه
مـن سبّته يامـيّت القلب ندمان
لعـل قلبك للعمى وش تبي به
أنصحك ياللي رشّك الشيب عميان
وادي جهنم حادر(ن) مع شعيبه
يطغيك زود المال والزود نقصان
غادي بسوق السؤ ليه تغدي به
لاتـدّعـي بالمال رابـح وخسران
يفلجك من زين العمل يدّعيبه
وافـطن لكلمة ويـل يوم للانسان
في موثقف ماينفع المرء جيبه
للـشـر ميـزان وللـخير ميزان
تكتب ملائكة السماء وتعدي به
خذ لك نصيحة واحد داج الاكوان
جرب غرابيل الدهر من نصيبه
من جاهد الدنيا بلا رووس جنحان
يصـبر لصكّات الـزمان الـرهيبه
ونـا الذي شفت الوزى يا سليمان
برد الشتاء والقيض اكلني لهيبه
مانيب اهين النفس لو كنت جيعان
مايدنع الا الكلب عقب تهزيبه
والله يـالـولا كلمة قال ديّان
حقي غدى به مانوى انه يجيبه
لاشهر كما يشهر مع الجو شيهان
قـطع الـبحور ولا حياة الغليبه
لجّوا علي الناس قوم وصدقان
واخترت عنهم بعد مسرى النجيبه
ماهبلك ياللي تلتوي لك بجابان
رجـل وهو جابان لاتلتوي به
لاساتر عرضك ولا قاضي شان
تكسب نزولك عقب مبدا الرقيبه
أبعد عن الجابان ولو كنت عريان
ثوب من الجابان لاتكتسي به
يارب تجعل لي من الذنب غفران
يافارجٍ لايوب مما بلي به