Published On Feb 15, 2022
ខ្មែរមានម្ហូបអាហារនំចំណីច្រើន និងប្លែកៗគ្នាតាមតំបន់ ពោលគឺមិនដូចគ្នាគ្រប់ស្រុកទេ។ និយាយបែបនេះ គឺមានប្រភេទនំធ្វើពីម្សៅម្យ៉ាងហៅថា “នំក្រៀប” ជាឧទាហរណ៍។ ជាទូទៅ គេច្រើនសង្កេតឃើញនំក្រៀបធ្វើ និងលក់ដូរហូរហែតែតាមខេត្តភាគខាងកើត និងខាងជើងភ្នំពេញដូចជាព្រៃវែង កំពង់ចាម សៀមរាប បន្ទាយមានជ័យ។ល។ ឯខេត្តប៉ែកខាងត្បូង និរតី និងជាប់ទៅសមុទ្រដូចជាមិនសូវប្រទះភ្នែក។ ប៉ុន្តែសព្វថ្ងៃ គេក៏ឃើញនំនេះមានលក់ជារឿយៗនៅភ្នំពេញ និងទីរមណីយដ្ឋាននានាដែរ ហើយប្រហែលអាចនឹងឆ្លងទៅតំបន់ដែលមិនធ្លាប់ឃើញពីមុនមកក៏ថាបាន។
នំក្រៀប ជាប្រភេទនំសម្រាប់ហូបលេង បែបអាហារសម្រន់កំដរមាត់ មានរសជាតិផ្អែមឡមៗ។ នំនេះ មិនមែនជាជំពូកនំធ្វើប្រចាំរដូវកាលដូចនំអន្សម នំជាល ឬនំបញ្ចុកឡើយ គឺគេអាចធ្វើហូប ឬលក់ដូរបានគ្រប់ពេល ជាពិសេសគេតែងធ្វើទុកសម្រាប់លក់ដូរក្នុងរដូវបុណ្យទាន ឬរដូវការក្នុងភូមិស្រុក។ វាជាប្រភេទនំធ្វើពីម្សៅដំណើប ហើយឃើញមានជាប់មិនដាច់តាំងពីដើមមក សូម្បីតែក្នុងសម័យអាណាព្យាបាលបារាំង ក៏គេសង្កេតឃើញមានធ្វើលក់ដូរហូរហែ ដូចនំអំបែង ឬនំនែកផ្សេងៗដែរ ។
