هلي
على واهسكم خبطنة الماي الازرك
طاليبن بدين واعرض دينة
وعلى واهسكم لكينة الكصبة كعبة
نزور حدها ولو سفاهة بعينة
وعلى واهسكم عرفنا الموت الاول
واستحة وعينة نثنت من عينة
وجان ليل الخوف لفحة ريح شتوة
ولو شبكنة الكاع يعرك ليلنة
وجانت الضحكة جوالي
تناثرت ضحكة بحوافر خيلنة
وعلى ريحتكم تلكتنة الشواطي
بفرح نفية وطحنة كلمنة اثنينة
كلمة بيها الماي ذبل كل زراكة
كلمة بيها العين غبش كل فرحها
وخضرت طاكات بخدود الرفاكة
وباكة باكة
الموت من يحصد الوادم باكة باكة
وباكة باكة
الصوت من يصحة على ظالم باكة باكة
هلي وبتنة كلوبنا ولاية وسوالفنة ضفيرة
وشوكنا الدهلة ومحبتنة وخبزنا ضنونة
وخطارنا تراب الجزيرة
وديرة ديرة
الفيض من يمحي المعالم ديرة ديرة
وديرة ديرة
الموت من يشرب الوادم ديرة ديرة
وصبحت ياهلي على جفون الخواطر غاليات
وطيفكم مهو طيفكم عاود على عيوني حنينة
وجرعت روحي لاجلكم حنظل الوحشة
ولكيت الروح بالصفنات امينة
وذاك من ذاك الي لكة النجمة العزيزة
بلا سما ودكلها عينة
وذاك من ذاك الي يحط كلبة على جفة
ويغسل باخر نزف وجه المدينة
وبينة بينة
شما تعب لف المغازل بينة بينة
وبينة وبينة
شما ثكل صوت الهلاهل بينة بينة
ومرت الوحشة على جفوفي
خرز سبحة وتعب روجة بلم
وسالفة وضحكة بدوية تموت باطراف الندم
ومرت الظلمة تغش الشوف الابيض
والطواري شما هوت هام البخت توكف علم
وجان جفي يلاعب النسمة وذر الكذلة عشب
وجان كلبي يريد يكبر اكبر من اسمة من ذاته ويكره ويشكة ويحب
وجنت اسميكم الذمة ولسة اشيلنكم وصية بغير حد ماتنكتب
عفية نهران شكثر خدرانة ملهة ومايها الراكد عذب
هلي وسيرتو عليه بوحشتني حجاية بريد وبيت نايل
بيت نايل مثل المصوب الي اهلة مايدارونة
كلما يطيب الجرح عمدا يلجمونة
بيت نايل واشتهيتوني اكتبلكم عن وفة البردي
وحنين الماي ودموع السنابل
وعن العيون الي تلم الليل دمعة
وتشتعل وكت الوفة شموع ومشاعل
وعن الكلوب الي تموت بلاية اسم وبلا براية
وعن شمس طلكت باسمها وعسرت باول قضية
وغربتي وصوت النواعي يلوحني ويلتم بدية
الصوت بيه ريحة عيوني وبيه وهلي وحشة مسية
هلي يامن ضيعوني وكحة النفس ماتفعل تلين
منبت حزن ومخالف سنين
الليل لوسد الروازين
شمسين حمرة يخضر الطين
وهية وهية
العين من تكضي السوالف هية هية
وهية هية
الكاع من تجفي وتوالف هية هية
وليلة حظنتنة بتعبنة بخوفنة بيوت العشيرة
وجان اول بيت ضحكة
وجان ثالث بيت رجفة
وجان سابع بيت عين
وجان دحان المواكد كلمة مروة وهلة ونغطة جنين
وصوغتنا عيونهم طابك دنان ولبن شجوة وكلمة مكطوعة نفس طول السنين
وعين عين
شدت تالي الطوارف
عين عين
وعين عين
بلهفة تنشد على السوالف
عين عين
وعين لفتنة بحزنها وزوكت وجه الجرح
وعين هزتنة ونختنة يغزر ويانة الملح
وعين سالتنة من اجيتوا ماعثر بيكم صبح
هلي ودعنا الضفاير والضماير والخناجر والدفوا الغطى الجفوف
وجانت الهلهولة خرسة تضيح بالشفة وتطوف
الكاع من يكبر كلبها يشب عشبهة وتوصل حجاياتها لتالي الجروف
هلي وشرعني هواكم باب للخطوة الغريبة
وخايرتني عيونكم ذل لو قتل
وانا والموت التحمنا بمايكم ساق وحجل
الروح شاخص والعمر بركة كمر والموت ظل
وية كل لمظة جمر بكلبي رصاصة
وية كل لهبة اصرخ بدمي اشتعل
الدنيا من يشح ضواها الدم بكل حيلة يهل
هلي واخر مكاتيبي كتبتلك على الكاع
ابنكم باعتة الدنيا ولاباع