#Lo_zawh #Sailam #lozawh

Sailam khua hian hmanlai an pi leh pute hun aṭang tawhin, tih dan bik leh chin ṭhan bik neiin uar takin lo an zo ṭhin. Rambuai avanga Chhiahtlanga khawm an nih te pawh khan, an chin ṭhan thlah lovin uar takin lo an zo a, Chhiahtlang khaw pum an fang chhuak ṭhin a, sawi-khawm khaw dangte chuan mak an tiin hmuhnawm an ti a, an thlir duh ṭhin hle.

Sailam khaw ṭhenawm Sialsuk khua hian hetiang deuh hian lo an zo ṭhin a, anni erawh chuan 'Pawlmang' an ti thung. Hemi avang hian ngaih pawlh loh tur a ni a, he Sailam khuain lo an zawha an tih dan hi 'Pawlmang' a ni ve kher lo tih hriat tur a ni. Tin, khaw dang tih entawna tih a ni lo a, a hunlai ṭheuhah khaw hrang hrang hian lo zawh lawmna neiin tih dan bik kan nei ṭheuh a ni.

Covid-19 hripui len laia Sawrkar SOP kalha hetianga hun hman hi a fuh lo kan ti a nih pawhin a dik reng mai. Sailam khua hi Covid-19 kan hriat tirh aṭanga khaw bila inkhuahkhirhna ṭha tak kalpui reng an ni a. Sawrkar dan zulzuiin khawtlang VLTF ten khawtlang tana ṭha turin ruahmanna kartin an siam ṭhin. Tun thlengin a khaw inlungrualna leh thuawihna bakah, Pathian khawngaihna avang liau liauvin khaw chhungah hri kai an la awm lo a ni. Quarantine leh test te uluk taka kalpuiin hma lak reng a ni a, hemi avang hian Aizawl Dist. chhunga khaw tlemte zinga inkhawm leh sikul kal theihna khua a ni bawk. He lo zawh pui hmang tur pawh hian uluk taka inenthla a, inveng reng chungin ruahmanna siam chhoh a ni a. Khaw danga thil ṭul avanga awm, a khaw mi ngei te pawh he hun hmang turin an haw rem tih a ni lo. Chutiang chuan khawtuala awm nghet, hri laka him ni-a hriatte chauhin he hun hi an hmang a ni.

Pathian khawngaihna azarah, hri te a darhin an in kai lo turah ngai ila. Chutiang ni lo a, a chhe ber a lo thleng ta anih pawhin, Pathianin a rel fel chek ang.