Published On Oct 14, 2024
هالدنيا لو ضاگت بيك اتوجه المعصومة
_
بهالدنيا لو مشغول كلش بالك
وحالك تغير واختلف كل حالك
اگصدها واتشوف العجب بفعالك
تكشفلك اهواي اسرار وتسرك المظلومه
____
كـل كسره البروحك ترد تجبرها
ولو عسرت الدنيا عليك اتسـرها
مكضيه كل حاجه تره الخـاطرها
سر بيها وهواي انشوف اسرار ما معلومه
____
بنت الامام المايرد كل طلبه
اخت الرضا المعروف يگضي الصعبه
عمها الجواد اليشفي من العتبه
انخاها لو طحت بضيج متردك المهمومه
_
انخاها يازاير واجري العبره
وحلفها بمصاب الزجيه الزهره
حاشاها متردك وتشفي ابنظره
معروفه تكضي الحاجات وثق حاجتك محسومه
_
انخه النقيه بـگلب كلش مكسور
وخلي الدموع اتسولف بهالمستور
بحضرتها تتذكر مصايب عاشـور
وحدها تذرف لعيون من تذكر المهضومه
_
قصتها تفجع والوجع من راحت
وجاها الخبر مات الرضا وهم ماتت
الله يساعد زينب اشگـد شافـت
شافت حوافر والروس وماتت واهي ملچومه
__
الشاعر السيد محسن الجابري
ليلة ١٠/ربيع الآخر /١٤٤٦هجري
الاثنين 14\10 \2024 ليلة
استشهاد مولاتي السيده فاطمة
المعصومه عليها السلام
في مسجد الإمام علي ابن
موسى الرضا عليه السلام
حله محلة جبران #نزله
#قصائد1446هج #ميمر
