في الليالي الوضح
و العتيم الصبح
لاح لي وجه الرياض
في مرايا السحب
كفّها فلّت جديله .. من حروف
و قصّة الحنّه طويله .. في الكفوف
من نده عطر الرفوف ..
لين صحّاه
في ثيابك .. يا الف ليله ..
و في الهبوب
انتشينا يا هبوب النعاس .. و الحلم
ألف غصن من اليباس ..
فزّ لأجلك و انثنى
و إن عشقتيني أنا
ما أبي من الناس .. ناس
ما علينا ..
لو عشقنا و انتشينا
آه ما أرقّ الرياض
تالي الليل
أنا لو أبي .. خذتها بيدها و مشينا
****
يا نصيبي من الصور و الرسايل
و من كلّ شمسٍ قايمه .. وكلّ ظلٍّ مايل
يا مكاني من البيوت .. و من الصحاري
اللي غرّبت فكري .. قبايل
إقبلي مثل ديم
مثل نارٍ في هشيم
من غصون الضيّ
من ليل الغضى
و بين ما خلّى النخيل من الفضا
و ما نسى الغيم
ما علينا
لو عشقنا و انتشينا
آه ما أرقّ الرياض
تالي الليل
أنا لو أبي .. خذتها بيدها و مشينا
****
وين أحب الليله .. وين
وين أحب .. و وين أهيم
إرفعي طرقة الشيله عن سديم
عن شموس و كوكب وهّاج
و اجرحيني بنصل طرف سادرٍ و حجاج
شقّقيني يا الهبوب العارضيّة
لين أغنّي للهوى ..
و الهوى ما هوْ خطيّة
آه ما أرقّ الرياض
تالي الليل
أنا لو أبي .. خذتها بيدها و مشينا

عمل ايديآ