Published On Jul 28, 2024
كربت. احلى ايام. ....ايام الزياره.
وانه انتضر كل عام...ايام الزياره.
امد روحي بدربكم ...عشت عمري انتضركم
ايام الزياره
*******************
يعطر الهيل بيكم من تمرون
بتراب اجدامكم كحلت العيون
رايه على المتن لمن تشدون
ترف عين الشمس بيها تسدون
كلبي وياكم يروح .. ينصار العقيله
كلكم دوه الجروح .. ينصار العقيله
رحت فدوه الجدمكم ...عشت عمري انتضركم
ايام الزياره
*******************
يزاير كربله مر بينه لحضات
فتحنه اكلوبه وانريدك اتبات
فرشنه عيونه بكل المسافات
وشتلنه ادموعنه بكل خطوه رايات
الجيتك نفرش ضلوع .. بهالسفره العظيمه
وتترس خدنه الدموع .. بهالسفره العظيمه
وعله الزهره اجركم ...عشت عمري انتضركم
ايام الزياره
*******************
شرف خدمتكم بنص الدواوين
غير انتم بعد زوار الحسين
خدمتكم شرف عالراس والعين
نشعر بالقصور وي ام البنين
هيه اتقدم اولاد .. لحسين وخدمته
وحنه اندور امراد .. لحسين وخدمته
امر واجب طلبكم ...عشت عمري انتضركم
ايام الزياره
*******************
تضل عيني بدربكم تحسب احساب
عام هواي بينه ايطول الغياب
مثل شمعه بهجركم كلبي لو ذاب
تكتل من بعدكم كعدت الباب
خايف تخلص بساع .. جيتكم علينه
يذبح يوم الوداع .. جيتكم علينه
واخافن من هجركم ...عشت عمري انتضركم
ايام الزياره
*******************
فرشنه اكلوبنه بكل المواكب
من ازغر طفل لآخره شايب
يزوار بدربكم كلبي ذايب
ما ريد ارجع من الخدمه خايب
نصير الكم معازيب ... خدمتكم كرامه
تبقه وياي لشيب .. خدمتكم كرامه
نذر عمري العمركم ...عشت عمري انتضركم
ايام الزياره
*******************
تمت
احمد الخفاجي
